Шетел тілінен бастауыш білім беру мұғалімі

Шетел тілінен бастауыш білім беру мұғалімі - шет тілінің фонетикасы, лексикасы және грамматикасы саласындағы тілдік білімге, шеберлік пен дағдыларды меңгеруді оқытатын педагог. Бұл педагогикалық профиль мамандығы, оның кәсіби саласы бастауыш білім берудің пәндік саласы болып табылады. Қазіргі заманда тек бір тілді білу жеткіліксіз. Бірнеше тіл білу - жетістікке апарар жол! Шет тілдерін бастауыш сыныптардан бастап оқу керек.

Шетел тілінен бастауыш білім беру мұғалімі оқытатын пәннің ерекшелігін ескере отырып, мемлекеттік жалпыға міндетті білім беру стандарттарына сәйкес оқушыларды оқытуды және тәрбиелеуді жүзеге асырады. Білім алушы тұлғасының жалпы мәдениетін қалыптастыруға және оны әлеуметтендіруге ықпал етеді, білім алушылар мен тәрбиеленушілердің жеке қабілеттерін анықтайды және дамытуға ықпал етеді. Оқытудың түрлі формаларын, тәсілдерін, әдістері мен құралдарын қолданады. Пәнді жүргізу бойынша сабақ жоспарларын құрайды. Оқу процесіне инновациялық білім беру, оның ішінде ақпараттық технологияларды енгізуді қамтамасыз етеді.

Орташа жалақы 60-100 мың теңге аралығын құрайды.

Мамандық түлектері бастауыш сыныптарда ағылшын тілі мұғалімі; мектепке дейінгі білім беру мекемелерінде ағылшын тілі мұғалімі лауазымдарында жұмыс істей алады.

Жоғары деңгейдегі маман болу үшін минималды тәжірибе - 4-5 жыл.

Кез-келген мұғалім сияқты шет тілі мұғалімінде де стресске төзімділік, табандылық, коммуникативтілік, ұжымда беделге ие болу және оны сақтай алу қабілетінің болуы өте маңызды. Әлбетте мұндай педагог жақсы есте сақтау қабілетімен, мінсіз дикциясымен ерекшеленуі керек, өзі сабақ беретін тілін жетік білуі тиіс. Бұл маман қарапайым мұғалімнен тек ағылшын тілін меңгергендігімен ғана емес, сонымен қатар осы тілде сабақ беру және құжаттаманы жүргізе алу қабілетімен де ерекшеленеді.

Жас маман әдістемелік жұмысты ұйымдастырудағы тәжірибесінің болмауы сияқты қиындықтарға тап болуы мүмкін. Сонымен қатар бұл мамандық жеткілікті дамыған коммуникативті дағдылардың болуын қажет етеді.

Бұл мамандық еңбек нарығында әрдайым сұранысқа ие болуға, түрлі деңгейдегі байқауларға үнемі қатысуға, өзінің кәсіби біліктілігін арттыруға, әдістемелік бірлестіктердің қызметіне және әдістемелік жұмыстың басқа да түрлеріне қатысуға мүмкіндік береді.

Осы бағыт бойынша колледжде оқуды аяқтағаннан кейін университетте оқуын жалғастыруға болады.